國米搶分「-2」照爆基

2019-05-13 09:43:10 来源:网络

周二凌晨歐洲波繼續上演,等阿King同大家講講過關心水。其中意甲壓軸戰,國際米蘭主場鬥基爾禾,國米為保前4已無失分空開,呢場面對已經鐵定降班嘅基爾禾,相信以國米鼎盛陣容,絕對夠卡士大炒一場,讓球主勝值博。

(MyTV Gold 301、Now 638、有線614及654台周二凌晨3時直播)

國米近期戰績麻麻,連續4場主場都贏唔到,令前4形勢又再出現險情,不過睇真啲,呢4場波嘅對手係祖雲達斯、羅馬、阿特蘭大等前列分子,失分都無可厚非,目前佢哋聯賽尚餘3仗,今晚對住由負分起步,如今篤定降班嘅基爾禾,贏波3分志在必得,加上佢哋嘅射手莫路伊卡迪為博表現爭入阿根廷國家隊出戰美洲盃,遇弱肯定搶住數胡,即使今仗要讓兩球照捧讓球主勝。

諾高平哥登堡演慣大騷
跟住再睇兩場北歐波,首先瑞典超有諾高平主場面對哥登堡。哥登堡今季踢法進取,開咧7仗有6次開3球或以上,入球大值得留意。講到挪超史卓加斯特主場迎戰維京,上季勉强護級嘅史卓加斯特始終未能擺脫飄忽表現,好彩維京作客都唔算出色,兩隊水鬥水寧願轉捧細盤好過。